糞-臭-素

(「卡式香港」為香港實體音樂雜誌<紙談音樂 Re:spect>專欄，由樂評人/填詞人關栩溢主筆，主力介紹香港新生代發行的卡式帶  ig:cassettehongkong)

C9H9N：糞臭素，是一種化合物的名稱，也是今日介紹香港Grindcore樂隊的名字。 早前在Bandcamp看到他們推出專輯，見到如「糞食類犬科動物」、「放射性腹瀉」、「糞便移植手術」等歌名，深知此樂隊非池中物，所以卡式香港找了他們來作訪問。

卡：關栩溢@卡式香港
C: C9H9N

卡： 可否介紹一下樂隊名稱C9H9N的由來？

C: 其實名稱來至另一位朋友的idea，本身這project最初係喺兩年前同佢一齊合作，但當時因為工作比較忙最後不了了之，而當初佢提意呢個名時我立即二話不說應承。「糞臭素」呢樣化合物除咗喺糞便中，亦會存在喺一啲花同精油當中，經過稀釋後甚至會用喺食物嘅香料，呢種能夠存在喺咁極端情況嘅特質正正係我一直以來創作嘅理念。

卡：可否介紹一下專輯的創作理念？

C：呢個專輯其實比較隨心直覺，創作時剛剛遇著“武肺”就索性將C9H9N嘅本體結合當時嘅時事嚟做第一張專輯。Coshit virus 就係兩者嘅結合，如果能夠將音樂某程度記錄當時嘅社會都係一件唔錯嘅事。

卡：為何選擇以卡式帶/CD作為發行媒體？

C：本身都係一直以玩票性質創作，無點諗過發行嘅問題，最多都係計劃自費印少量CD俾朋友笑下留個紀念，只係估唔到後來陸續有lable公司聯絡我幫C9H9N發行CD，所以就開始認真諗發行問題。起初覺得只有實體CD有啲單調，所以想自費印刷MD(MiniDisc)嚟個不一樣，但事實發行MD係個不太實際嘅想法，有好多地方都切合唔到要求，加上選擇又少所以最後放棄。後來經朋友介紹先知原來香港有間本地lable可以幫客人印製卡式盒帶，而cassette絕對係80後嘅我一個情義結，人生第一部walkman，第一次錄音都係用cassette，咁理所當然今次發行都用cassette喇。(p.s謝謝Infree Records & Findme Records)

卡：可否分享一下樂隊/成員的音樂影響？

C：講到影響我最最最深嘅一定係Mortician呢隊樂隊，歌曲用上大量電影對白作為intro，簡短有力嘅編曲配上高速嘅beast beat令聽眾極快投入，當年年少無知嘅我一聽就上癮，就算到後來開始創作唔同類型嘅音樂時，都會不忘加上呢啲特質豐富首歌。

卡：如何看本地grindcore scene？

C：本地嘅grindcore scene真係有啲難講，呢種類型喺本土非常罕見，又或者大家都玩得好低調，但聽嘅人反而唔少。好希望日後可以見到更多呢類型喺本地出現，大家可以一齊合作做更多split album。

卡：可否介紹一下盒帶Graphic 的設計意念？

C：呢類嘅封面創作其實可以話係由1988年Carcass嘅第一隻album---Reek Of Putrefaction帶起。主體通常都係由屍體堆砌而成，色系都比較一致，能夠帶出強烈不安感，而今次嘅專輯就將排泄物與屍體混和堆砌，能帶出不安感之餘同時產生厭惡感，非常切合呢個專輯嘅主題，只係略嫌唔夠香港本土特色，就留俾下一張專輯發揮吧。



https://c9h9n.bandcamp.com/album/coshit-virus